පරිසර නීති නිසා ඇමරිකාවේ කාර්මික දූෂණය අඩුවෙලා

ජගත් පරිසර පුවත් 276 - 15.08.2018

ධනේෂ් විසුම්පෙරුම

විදුසර, 15.08.2018, පි. 3 (Vidusara)

වර්ෂ 1990 හා 2008 අතර කාලයේදී ඇමරිකාවේ කාර්මික වායු දූෂණයේ මට්ටම වේගයෙන් අඩු වී ඇත. මේ පිළිබඳව සිදුකරන ලද අධ්‍යයනයකදී පෙනී ගොස් ඇත්තේ පාරිසරික නීති රීති හා ඒ හා සම්බන්ධව නිෂ්පාදන ක‍්‍රියාවලිය පවිත‍්‍රකරණය සඳහා පියවර ගැනීම මේ සඳහා වැදගත් වී ඇති බවයි.

American Economic Review සඟරාවේ පළ වීමට නියමිත උක්ත අධ්‍යයනයට අනුව 1990-2008 අතර කාලයේදී ඇමරිකාවේ කර්මාන්ත අංශයේ වායු දූෂක විමෝචනය වීම 60%ක් පමණ ප‍්‍රමාණයකින් අඩු වී ඇත. එහෙත් මේ කාලයේදී නිෂ්පාදකයින් තමන් පෙර නිෂ්පාදනය කළ ආකාරයේම භාණ්ඩ පෙරට වැඩි ප‍්‍රමාණවලින් නිෂ්පාදනය කර තිබෙයි. එසේ තිබියදී මෙවැනි වෙනසක් ඇති වූයේ කෙසේද යන්න මෙම අධ්‍යයනයේදී විමසා බලා තිබෙයි.

එ් සඳහා ඇමරිකාවේ නිෂ්පාදනය කරනු ලැබූ භාණ්ඩ 1400ක් පමණ ප‍්‍රමාණයක 1990-2008 කාලය සඳහා වූ නිෂ්පාදන දත්ත පරීක්ෂා කර ඇත. එසේම එම කර්මාන්තශාලාවලින් නිකුත්වන වායු දූෂක දත්තද මෙම පර්යේෂකයන්ගේ අවධානයට ලක්ව තිබෙයි. ඉන්පසුව අඩු වී ඇති විමෝචන සිදුව ඇත්තේ කුමන කරුණක් නිසාද යන්න පැහැදිලි කර වර්ග කිරීමට ඔවුන් පියවර ගන්නා ලදි. එ් නිෂ්පාදන ප‍්‍රතිදානය, නිෂ්පාදනය කරනු ලබන භාණ්ඩවල සිදුකර ඇති වෙනස්කම්, නිෂ්පාදන තාක්ෂණයේ වෙනස්කම් ආදි වශයෙනි. මෙහිදී පෙනී ගොස්තිබුනේ වැඩිම විමෝචන අඩුවීමක් සිදුව ඇත්තේ නිෂ්පාදන තාක්ෂණයේ සිදුකර ඇති වෙනස්කම් නිසා බවය.

මේ සඳහා කර්මාන්තකරුවන් ස්වකීය නිෂ්පාදන ක‍්‍රියාවලිය පිරිසිදු කිරීමට දැඩි ලෙස පියවර ගෙන තිබීම මේ සඳහා බලපා ඇත. මෙසේ පිවිතුරු නිෂ්පාදන ක‍්‍රියාවලිය යොදාගැනීමට ඔවුන් පෙළැඹී ඇත්තේ පවත්නා නීති රීති පද්ධති සමඟ ගැලපීම සඳහාය. මේ සඳහා දායක වී ඇති පනත ලෙස හඳුනාගෙන ඇත්තේ මධයම රජයේ පවිත‍්‍ර වාතය පිළිබඳ පනත හා ඊට සම්බන්ධ නීති රීතිය. දැනට වර්ෂ පනහකට පමණ පෙර අපේක්ෂා කරන ලද්දේ ඉහළ යන වායු දූෂණය නිසා ඇමරිකාවේ ඇතැම් මහා නගරවල වාසය කිරීම 20වන සියවස අග පමණ වන විට අසීරු වනු ඇති බවයි. එහෙත් පාරිසරික නීති රීති නිසා මේ තත්ත්වය වෙනස් වී වායු දූෂණය වේගයෙන් පහළ වැටී තිබෙයි.