ධනේෂ් විසුම්පෙරුම
පරිසර පුවත් 480
විදුසර, 2022-12-28, පි. 2
පසුගියදා මොන්ට්‍රියල් නගරයේ දී පැවති ජෛව විවිධත්ව සමුළුවේ දී ඇති කරගත් මූලික එකඟතාව ජෛව විවිධත්ව සංරක්ෂණය සඳහා වැදගත්ය. 2030 වර්ෂය වන විට ලෝකයේ මුළු භූමියෙන් හා ජල ප්‍රදේශවලින් 30%ක් පමණ ආරක්ෂා කිරීම මේ අතරින් වඩාත් වැදගත් කරුණයි. මේ ඉලක්කය ඒ සමුළුව ආරම්භ වීමට පෙර සිටම අවධානයට ලක්ව තිබූ කරුණකි. කෙසේ වෙතත් සාකච්ඡා අතර මේ ප්‍රමාණය අඩු කිරීම සඳහා ඇතැම් රටවල් උත්සාහ කළ නමුත් මේ ඉලක්කය ඇති කර ගැනීම සඳහා සහයෝගය දුන් රටවල් අඛණ්ඩව දැරු ප්‍රයත්නය අවසානයේ දී සාර්ථක විය.
මේ එකඟතාවය වැදගත් හා ඓතිහාසික ඉලක්කයක් වීම නිසා ඇතැම් පිරිස් මේ සමුළුව ජෛව විවිධත්වය සම්බන්ධ ‘පැරිස් සමුළුවක්’ හා ‘පැරිස් අවස්ථාවක්’ ලෙස දක්වා ඇති බවක් පෙනේ. එයට හේතුව 2015 වර්ෂයේ දී ඇති කරගත් පැරිස් ගිවිසුම දේශගුණ වෙනස් වීම සම්බන්ධව ලෝකය එකඟ වූ වඩාත් සාර්ථක වූ ප්‍රතිචාරයක් වීම නිසාය.
මේ ඇතිකරගත් එකඟතාවයට කොංගෝ රට එකග නොවන බව අවසන් මොහො‌තේ දී පැවසීම විශේෂ සිදුවීමකි. එහෙත් සමුළුවේ සභාපතිත්වය දරන ලද චීනය ඒ බව නොසලකා කටයුතු කිරීමත්, ඒ විරෝධය නිසා මේ එකඟතාවය නීත්‍යානුකූල බවට ඇති වූ තර්කයත් නිසා සිදු කළ විමසීමේ දී ඇති කරගත් එකඟතාවය වලංගු බව පෙන්වාදෙන ලදි. මේ අවස්ථාවේ දී චීනයේ හැසිරුණු ආකාරය ප්‍රශංසාවට ලක්ව ඇති බව පෙනේ.
