උතුරු අර්ධගෝලයේ ආන්තික සීතල

ධනේෂ් විසුම්පෙරුම

පරිසර පුවත් 480

විදුසර, 2022-12-28, පි. 2

පසුගිය දිනවල උතුරු ඇමරිකාවේ පැවති දැඩි සීතල තත්ත්වය මාධ්‍යවල අවධානයට ලක් වී තිබේ. හිම කුණාටුවලින් ඇමරිකාවට හා කැනඩාවට දැඩි බලපෑමත් ඇති විය. බොහෝ ප්‍රදේශවල ගමනාගමනය සඳහා බලපෑම් ඇති වූ අතර, විදුලිය ඇනහිටීම් ද වාර්තා වී තිබේ. එසේම දැඩි සීතල නිසා මරණ කීපයක් ද ඇති වී තිබේ. ඇමරිකාවේ පමණක් මිලියන 1.5ක් පමණ පිරිසක් මේ තත්ත්වය මුහුණ දුන් බව වාරතා විය.

මේ ආන්තික තත්ත්වය දේශගුණ වෙනස් වීම සමඟ කිසියම් සම්බන්ධයක් පවත්නා බව රහසක් නොවේ. උෂ්ණ තත්ත්වවල ආන්තික තත්ත්ව (අධික උෂ්ණත්වය ඇති අවස්ථා) ඇති වීම මෙන්ම ශීත තත්ත්වවල ආන්තික තත්ත්ව (දැඩි සීත තත්ත්ව) ඇතිවීමක් දැන් දැන් ඉහළ යමින් තිබේ. මෙවැනි ආන්තික සීතල තත්ත්ව මීට පෙර ද ඇති වී ඇතත්, ඒවා දැන් දැන් වඩාත් දැඩි වූ ස්වභාවයක් ගනී. මේ තත්ත්වය මිනිසුන්ට පමණක් නොව සෙසු ජීවීන්ට මෙන්ම පරිසර පද්ධතිවලටත් බලපාන බව ඇතැම් විට අමතක වන කරුණකි. විශේෂයෙන් කෙටි කාලයක් තුළ සිදුවන විශාල ප්‍රමාණයේ වෙනස්කම් ජීවීන්ට බලපෑම් ඇති කරයි. එම ජීවීන්ගේ අනුහුරුවීමේ හැකියාව සම්බන්ධව‌ මේ උෂ්ණත්ව වෙනස් වීම බලපායි. නිදසුනක් ලෙස ගතහොත්, අධික ශීත ත්ත්ත්වවල දී පක්ෂීන්ට වැඩි ශක්තියක් හා වැඩි ආහාර ප්‍රමාණයක් අවශ්‍ය වේ. එහෙත් අධික ශීත කාලයක දී පක්ෂීන්ට ආහාර සපයා ගැනීම අපහසු කරුණකි.