ධනේෂ් විසුම්පෙරුම
පරිසර පුවත් 479,
විදුසර, 2022-12-14
ගෙවිලියන් වැනි එළිමහනේ වැඩ කරන ගැබිණි කාන්තාවන්ගේ ගර්භාෂයේ වැඩෙන භ්‍රෑණයට ඉහළ යන උෂ්ණත්වයෙන් බලපැමක් සිදුවිය හැකි බව අධ්‍යයනයකින් පෙන්වා දී තිබේ. උෂ්ණත්වය ඉහළ යන තත්ත්වයක් තුළ ගැබිණි මව්වරුන් උෂ්ණත්ව ආතතියකට ලක් වීමෙන් ඔවුන්ගේ මව්වරුන්ගේ හෘද ස්පන්දන වේගය ඉහළ යන අතර, භ්‍රෑණයට සැපයෙන රුධිර සැපයුම අඩු වන බව මෙහි දී හෙලි වී ඇත.
ගැම්බියානු කාන්තාවන් අනූදෙදෙනෙකු ආශ්‍රිතව සිදු කර ඇති මේ අධ්‍යයනයේ දී මෑත කාලයේ දී පරිසරයේ උෂ්ණත්වයේ හඳුනාගත හැකි වර්ධනයක් සිදු ව ඇති බව පෙන්වා දී තිබේ. මීට පෙර සිදු කර ඇති අධ්‍යයනවල දී මළ දරු උපත්, නොමේරූ දරු උපත්, අඩු බර දරුවන් බිහි වීම ආදිය සඳහා ඉහළ උෂ්ණත්වය බලපාන බව පෙන්වා දී තිබුන ද, ඒ සියල්ල සෞම්‍ය කලාපීය රටවලින් වාර්තා වූ ඒවාය. මේ අධ්‍යයනය වැදගත් වන්නේ ඉහළ යන උෂ්ණත්වය දැඩි ලෙස බලපාන නිවර්තන කලාපීය රටක ගෙවිලියන් යොදා ගනිමින් සිදු කළ එකක් නිසාය.
මේ තත්ත්වය සඳහා පිළියම් යෙදිය හැකි ආකාරය සම්බන්ධව ද මෙහි දී අවධානය යොමු කර ඇත. ඉන් එකක් වන්නේ එළිමහන් වගා බිම්වල ගස් වැවීමයි. එමගින් මේ කාන්තාවන්ට මෙන්ම ඇතැම් භෝග ද තාප ආතතියට ලක්වීම වැළැක්විය හැකිය. අයිස් තැබීම හා තාප ආතතියක ලක්ෂණ ඇති විට එළිමහනේ කටයුතුවලින් ඈත් වීම ද ගත හැකි පියවර අතර වේ. කෙසේ වෙතත්, මොවුන් යැපුම් මට්ටමේ වගා කටයුතුවල යෙදෙන පිරිස් බැවින් සමහර පියවර ප්‍රායෝගික නොවිය හැකිය.
No comments:
Post a Comment