ජගත් පරිසර පුවත් 365 - 24.06.2020
ධනේෂ් විසුම්පෙරුම
විදුසර, 24.06.2020, පි. 3 (Vidusara)
දේශගුණ වෙනස් වීම හේතුවෙන් ඉදිරි දශක කීපයක කාලය ඇතුළත ලෝකයේ විවිධ ක්‍රීඩා තරගවලට ගැටලු ඇති විය හැකි බව පසුගියදා එළිදක්වන ලද වාර්තාවකින් පෙන්වාදී තිබේ. එ් සඳහා මූලික හේතුව වන්නේ ලෝකයේ උෂ්ණත්වය ඉහළ යෑම හා එහි ප්‍රතිඵලයක් ලෙස ඇති විය හැකි බලපෑම්ය.
මෙවැනි එක් බලපෑමක් වන්නේ ආන්තික කාලගුණ තත්ත්ව ඇති වීම සුලභ වීමයි. නිදසුනක් ලෙස ගතහොත්, එංගලන්තයේ පාපන්දු තරගාවලි සඳහා යොදාගන්නා ක්‍රීඩංගනවලින් හතරෙන් එකක් පමණ (පිටි 92න් 23ක්) ප්‍රමාණයක් 2050 වර්ෂය වන විට සෑම වර්ෂයකදීම සම්පූර්ණයෙන්ම හෝ කොටසක් හෝ ගංවතුරට යට විය හැකිය. දැනටමත් සුළු වශයෙන් දැකිය හැකි මෙය සියලු ආකාරයේ පාපන්දු තරග සඳහා බලපෑමක් කළ හැකි කරුණකි. මේ වන විට ද ආන්තික කාලගුණ තත්ත්ව නිසා ලෝකයේ විවිධ ප්‍රදේශවල විවිධ ක්‍රීඩා සඳහා බලපෑම් ඇති වී තිබෙයි. ජපානයේ පසුගිය වර්ෂයේ පැවැත්වීමට නියමිතව තිබූ රගර් තරගාවලියට කුණාටුවක් නිසා බාධා ඇති විය. එසේම මේ වර්ෂයේ මුලදී පැවැත්වීමට නියමිතව තිබූ ඔස්ට්‍රේලියානු විවෘත ටෙනිස් තරගාවලිය නතර කිරීමට සිදු වූයේ ලැව් ගිනි නිසා ඇති වූ දුමාරය හේතුවෙනි.
ඉහළ යන උෂ්ණත්වය නිසා ද ක්‍රීඩා තරග පැවැත්වීමට බාධා ඇති විය හැකිය. එවැනි ක්‍රීඩා අතර, ටෙනිස්, රගර්, මලල ක්‍රීඩා මෙන්ම ශීත ඍතු ක්‍රීඩා ද තිබෙයි. ක්‍රිකට් ක්‍රීඩාවට තර්ජනයක් ඇති වන්නේ ඉන්දියාව, ඔස්ට්‍රේලියාව හා බටහිර ඉන්දීය කොදව් වැනි රටවල ඉදිරියේදී ඇති වන අධික උෂ්ණත්වය නිසාය. ලෝකයේ ඇතැම් ප්‍රකට ක්‍රිකට් ක්‍රීඩාංගන පිහිටි ප්‍රදේශවල වර්ෂයේ ඇතැම් කාලවකවානුවල දී ඇති වන අධික උෂ්ණත්වය නිසා තරග පැවැත්වීම අපහසු විය හැකිය. එසේම මෙතෙක් ශීත ඍතු ඔලිම්පික් තරග පවත්වන ලද ස්ථාන 19ක් අතරින් 2050 වන විට ශීත ඍතු තරග පැවැත්වීමට සුදුසු වනු ඇත්තේ ස්ථාන 10ක පමණකි. ඒ අධික උෂ්ණත්වය නිසාය.
ලෝකයේ ක්‍රීඩා සංවිධායකයන් මේ තත්ත්වය සම්බන්ධව මෙතෙක් දැඩි අවධානයක් යොමු කර නොමැති බව මෙම අධ්‍යයනයෙහි සඳහන් වෙයි. කොවිඩ්-19 වසංගත තත්ත්වය නිසා ලෝකයේ සියලු ක්‍රීඩා කටයුතු අතිශයින් සීමා වී තිබෙන අද දවසේ මේ අනාගත තර්ජනය ගැන අවධානය යොමු කිරීමට සුදුසු අවස්ථාවක් බව මේ පර්යේෂකයන්ගේ අදහස වෙයි.
මූලාශ්‍රය - Playing against the clock: Global sport, the climate emergency and the case for rapid change,
සබැඳි -
(1). https://www.rapidtransition.org/resources/playing-against-the-clock/
ලෝකයේ ක්‍රීඩා සංවිධායකයන් මේ තත්ත්වය සම්බන්ධව මෙතෙක් දැඩි අවධානයක් යොමු කර නොමැති බව මෙම අධ්‍යයනයෙහි සඳහන් වෙයි. කොවිඩ්-19 වසංගත තත්ත්වය නිසා ලෝකයේ සියලු ක්‍රීඩා කටයුතු අතිශයින් සීමා වී තිබෙන අද දවසේ මේ අනාගත තර්ජනය ගැන අවධානය යොමු කිරීමට සුදුසු අවස්ථාවක් බව මේ පර්යේෂකයන්ගේ අදහස වෙයි.
මූලාශ්‍රය - Playing against the clock: Global sport, the climate emergency and the case for rapid change,
සබැඳි -
(1). https://www.rapidtransition.org/resources/playing-against-the-clock/
No comments:
Post a Comment