මයික්‍රොසොෆ්ට් සමාගම කාබන් ඍණ වීමට යයි

ජගත් පරිසර පුවත් 348 - 22.01.2020

ධනේෂ් විසුම්පෙරුම

විදුසර, 22.01.2020, පි. 3 (Vidusara)

සිය සමාගම ආරම්භ කළ 1976 වර්ෂයේ සිට මේ දක්වා විමෝචනය කළ සියලු කාබන් විමෝචන පරිසරයෙන් ඉවත් කරන බවට ප්‍රතිඥාවක් මයික්‍රොසොෆ්ට් සමාගම ලබා දී තිබෙයි. මේ ඉලක්කය 2050 වර්ෂය වන විට අත්පත් කරගැනීමට අපේක්ෂා කරන බව එහි ප්‍රධාන විධායක නිලධාරී සත්‍යා නඬේලා පවසා ඇත.

මේ සඳහා ඔවුන් ක්‍රියාත්මක කිරීමට අපේක්ෂා කරන ඉලක්කය වන්නේ 2030 වර්ෂය වන විට සමාගම කාබන් ඍණ වීමේ (carbon negative) ඉලක්කයකි. වෙනත් වචනවලින් පවසන්නේ නම්, සමාගම නිකුත් කරන කාබන් ප්‍රමාණයට වඩා වැඩි කාබන් ප්‍රමාණයක් පරිසරයෙන් ඉවත් කිරීම මගිනි. සමාගමේ ප්‍රධානීන් පවසන්නේ දැනටමත් නිකුත් වී ඇති කාබන් වායුගෝලයේ ඇති බැවින් මේ වන විට ජනප්‍රිය වී ඇති කාබන් උදාසීන වීම (carbon neutral) ප්‍රමාණවත් නොවන බවයි. මේ ආකාරයෙන් කාබන් ඍණ වීම සඳහා ඔවුන් යොදාගැනීමට අපේක්ෂා කරන්නේ වායුගෝලයෙන් කාබන් ඉවත් කර රඳවා තැබීමේ තාක්ෂණය යොදාගැනීමටය. ඒ අනුව නව වනාන්තර ඇති කිරීම හා පවත්නා වනාන්තර ව්‍යාප්ත කිරීම, පසෙහි කාබන් ගබඩා වීම ප්‍රවර්ධනය කිරීම, වායුගෝලයෙන් ඍජුව කාබන් ඉවත් කිරීම හා කාබන් අවශෝෂණය කරන ජෛව ඉන්ධන ප්‍රවර්ධනය යන අංශවලිනි. පරිසරයෙන් කාබන් ඉවත් කළ හැකි තාක්ෂණය පිළිබඳව නව සොයාගැනීම් සඳහා ඩොලර් බිලියනයක අරමුදලක්ද සමාගම විසින් පිහිටුවා ඇත.

මෙය කාබන් විමෝචන අංශයෙන් පිරිසිදු බලශක්තියක් වෙත යොමු වීමට මහා පරිමාණ ව්‍යාපාරික ආයතන අතර ඇති තරගය යහපත් ලෙසින් භාවිත වන අවස්ථාවක් පෙන්වන්නකි. නිදසුනක් ලෙස, ඇමසන් සමාගම 2040 වර්ෂයේදී කාබන් උදාසීන බවට පත් වන බවට ප්‍රතිඥා දී ඇත. දැන් මයික්‍රොසොෆ්ට් සමාගම තවත් ඉදිරියට ගොස් ඇත. කාබන් උදාසීන වීමේදී අදාළ සමාගයේ ශුද්ධ විමෝචනයක් නොමැත. එහෙත් කාබන් ඍණ වීමේදී සමාගම නිකුත් කරන ප්‍රමාණයටත් වඩා කාබන් පරිසරයෙන් ඉවත් කරනු ලැබෙයි. විශේෂයෙන් ඔවුන්ගේ කාර්යභාරයෙන් එපිටට ගොස් ලෝකයේ ඇති ප්‍රශ්නයක් දෙස වඩාත් විමසා බැලීමකි. එය වැදගත්ය.

මුල්පෙළේ සමාගමක් වන මයික්‍රොසොෆ්ට් සමාගමේ මෙම ප්‍රතිඥාව පරිසරවේදීන් විසින් සුභවාදීව පිළිගෙන ඇති බව පෙනෙයි. එසේම ලෝකයේ සෙසු මහා පරිමාණ සමාගම්ද මේ සඳහා යොමු විය යුතු බව ඔවුන්ගේ අදහස වෙයි.